Սկեսուրի կողմից դաժանաբար ծեծի ենթարկված Մարիամ Գևորգյանի պաշտպանը բողոքարկելու է դատարանի որոշումը
Սկեսուրի կողմից դաժանաբար ծեծի ու կտտանքների ենթարկված Մարիամ Գևորգյանի գործի քննությունը դռնփակ անցկացնելու դատարանի որոշումը տուժողի պաշտպան Նոնա Գալստյանը բողոքարկելու է, քանի որ մտավախություն ունի, որ նման պայմաններում նախ չի իրականացվի արդար դատաքննություն, նաև ճնշումներ կգործարկվի տուժողի, դատախազի նկատմամբ: Այս մասին ասուլիսում ասաց Ն. Գալստյանը: Մարիամ էլ նույն մտավախությունը ունի. «Ուզում եմ, որ բաց լինի դատաքննությունը, որ արդարացի լինի, նաև բոլորը իմանան, որ աշխարհում նման մարդիկ կան»:
Ն. Գալստյանն ասաց, որ Հայկանուշ Միքայելյանի կողմից կատարված հանցագործությունները ընտանեկան բռնության վառ օրինակներ են, ուստի կարևորելով նրա նկատմամբ արդարացի պատժի նշանակումը, գտնում է, որ նմանատիպ քրեական գործերի բաց դատավարությանների իրականացումը կնպաստի ընտանեկան բռնությունների ոլորտում կատարվող հանցագործությունների մասին հասարակության լայն շերտերի իրազեկմանը, հետագայում նմանատիպ հանցագործությունների կանխարգելմանը, դատական համակարգի նկատմամբ ձևավորված անվստահության և թերահավատության մթնոլորտի նվազեցմանը:
Նա դատարանի որոշումն անհիմն է համարում: Նրա խոսքով, իր կողմից ներկայացված բավականին ծավալուն առարկություններին դատարանը որևէ ուշադրության չի դարձրել: Իսկ դատաքննությունը դռնփակ անցկացնելու դատարանի որոշման պատաճառբանությունը հինգ-վեց նախադասությունից էր կազմված, որտեղ չկար որևէ հիմնավորում, հիմք, թե ինչու են նման որոշում կայացրել:
Ն. Գալստյանը նաև ասաց, որ մեղադրյալի որդին, այսինքն տուժողի ամուսին Դ. Զիրոյանը, ով այս գործով որպես վկա է հանդես գալիս, հանցավոր գործություններ է կատարում. երկու դատական նիստերի ընթացքում էլ նա խուլիգանական գործողություններ է կատարել` սպառնացել է ԶԼՄ-ների, ՀԿ-ների ներկայացուցիչներին, ովքեր ներկա են գտնվել դատական նիստերին: Նա փորձել է ԶԼՄ-ների ներկայացուցիչներին արգելել տեսանկարահանել, սպառնացել է տուժողի բարեկամներին: Փաստաբանն ասաց, որ նրա այս արարքները պետք է արժանանա իրավական գնահատականի, բայց որևէ արձագանք դեռևս չկա, ու եթե այսպես շարունակվի նաև հետագա նիստերի ընթացքում, միջնորդությամբ են հանդես գալու` քրեական պատասխանատվության ենթարկել նրան:
«Ընդդեմ կանանց նկատմամբ բռնության» ներկայացուցիչ Աննա Նիկողոսյանն ասաց, որ կոալիցիան իր դժգոհությունն է արտահայտում դատարանի` նիստերը դռնփակ անցկացնելու որոշման դեմ ու այսօր գլխավոր դատախազության մոտ բողոքի ակցիա են կազմակերպում:
Հիշեցնենք, որ Մարիամի ամուսին Դավիթ Զիրոյանի նկատմամբ մեղադրանք էր առաջադրվել` ՔՕ «Դիտավորությամբ ուրիշի առողջությանը միջին ծանրության վնաս պատճառելու» (բայց առանց «առանձնակի դաժանության») և «Ծեծ» հոդվածների հատկանիշներով, սակայն նրա նկատմամբ կիրառվել էր համաներում, ու նա այժմ ազատության մեջ է: Իսկ սկեսուրը` Հայկանուշ Միքայելյանը կալանավորված է, նրա նկատմամբ մեղադրանք էր առաջադրվել ՔրՕր-ի 113 հոդվածի 2-րդ մասի 5-րդ կետով (առանձնակի դաժանությամ դիտավորությամբ առողջությանը միջին ծանրության վնաս պատճառելը) և 119-րդ հոդվածի 2-րդ մասի 6-րդ կետով (առանձնակի դաժանությամբ խոշտանգում):
Նախորդող նորություններ` Սկեսուրի կողմից դաժանաբար ծեծված հարսի գործով 2-րդ նիստն այսօր էր
Սկեսուրի ծեծից տուժած հարսի ներկայացուցիչը միջնորդելու է խստացնել նրա մեղադրանքը
«Սադիստ» սկեսուրն առերեսվել է մեծ հարսի հետ
Մարիամին դաժանորեն ծեծած սկեսուրը կալանավորվել է և այսօր կտեղափոխվի Հայաստան
Լրահոս
Տեսանյութեր
Քաղտեխնոլոգ. Մոսկվայում Ալիևը հրաժարվեց վճարել խաղաղապահների՝ Արցախից դուրս գալու գինը
